Kolviður gróðursetur
Sunnudaginn 31. maí birti Morgunblaðið frétt um Kolvið "Kolviður gróðursetur þrátt fyrir kreppuna.
Kolviður gróðursetur þrátt fyrir kreppuna
 Blómlegar Ösp Viðarsdóttir; Sigríður Heiðmundsdóttir og Klara Viðarsdóttir við gróðursetningu á Geitasandi. Árgilsstaðafjall og Þríhyrningur í baksýn. |
Óneitanlega er svolítið tómahljóð komið í kassann hjá okkur og með því að skoða tekjustreymi til Kolviðar getum við lesið í þróun efnahagsmála hér,“ segir Einar Gunnarsson, sem situr í stjórn Kolviðar fyrir hönd Skógræktarfélags Íslands.
Unnið er að því innan stjórnar Kolviðar að auka þátttöku erlendra ferðamanna í kolefnisbindingarverkefninu. Rætt hefur verið við Flugleiðir og Iceland Express um að gera Kolvið sýnilegri þegar fólk kaupir farmiða hingað til lands til þess að hvetja það til kolefnisjöfnunar á ferðalagi sínu. Sömuleiðis hefur verið reynt að auka þátt þeirra sem leigja bílaleigubíla í kolefnisjöfnuninni.
Björgólfur Thorsteinsson, formaður Landverndar og stjórnarmaður í Kolviði, segir að útlendingar séu margir hverjir meðvitaðri um kolefnisjöfnun en Íslendingar. Margir þeirra hafi lagt leið sína til að skoða ræktun Kolviðar á Geitasandi í Rangárþingi og þykir merkilegt að sjá þessa ræktun.
Kolefnisbinding sem bónus
„Sjóðurinn fór af stað með látum og lúðrablæstri 2007 en svo kom niðursveiflan sem hefur bitnað á Kolviði eins og öðru,“ segir Björgólfur. „Það sem skiptir þó mestu máli er að sjóðurinn er kominn á laggirnar og lifir áfram, þó svo að hann vaxi eitthvað hægar en gert var ráð fyrir. Hugmyndafræðin er ljós og það er mikilvægt þegar verið er að kolefnisjafna að hafa í huga hversu margvíslegur ábati er af starfinu.
Við bindum jarðveginn og komum í veg fyrir uppblástur. Við ræktum upp örfoka land og endurheimtum gróðurvistkerfi með skógrækt og landgræðslu. Við fáum síðan kolefnisbindinguna sem bónus en alþjóðlegur markaður er kominn fyrir kolefnisbindinguna, en það er enginn markaður fyrir landgræðslu sem slíka,“ segir Björgólfur.
Einar tekur í sama streng: „Í raun og veru er það mikil frétt að hægt skuli vera að fjármagna skógrækt á Íslandi með kolefnisgjaldi eða -jöfnun. Að tekist hafi að sýna fram á að þetta er hægt er stórmerkilegt.“
Fyrirtæki fresta
rúmlega 10,8 milljónum króna árið 2007 þegar sjóðurinn fór af stað, það er seld kolefnisjöfnun. Í fyrra voru tekjurnar rúmar 15 milljónir. Fyrstu mánuði þessa árs fór salan hægt af stað því mörg fyrirtæki ákváðu að fresta ákvörðun um kolefnisjöfnun vegna efnahagsástandsins. Vonir standa þó til að markaðurinn taki við sér síðar á árinu.
Árið 2007 voru gróðursettar 31.796 plöntur innan landgræðslugirðingar á Geitasandi, skammt frá Gunnarsholti. Í fyrra voru gróðursettar 143.478 plöntur og í vor verða verða gróðursettar 150 þúsund plöntur. Vonir standa til að í haust verði lokið við að gróðursetja í þá 190 hektara sem samið hefur verið um á sandinum. Skógræktarfélag Rangæinga er verktaki hjá Kolviði við gróðursetningu.
Eftir Ágúst Inga Jónsson
aij@mbl.is
Fara til baka
